भोक्राहा नरसिंह गाउँपालिकामा प्रजातन्त्र दिवसको अवसरमा दीप प्रज्वलन
चुन चुन झा, भोक्राहा नरसिंह। प्रजातन्त्र दिवसको अवसरमा भोक्राहा नरसिंह गाउँपालिकामा दीप प्रज्वलन कार्यक्रम हिजो २०८१/११/०७ गते सम्पन्न भएको छ। गाउँपालिकाको कार्यालय परिसरमा आयोजित उक्त कार्यक्रममा स्थानीय जनप्रतिनिधि, कर्मचारी, राजनीतिक दलका नेता, सामाजिक संस्थाका प्रतिनिधि तथा सर्वसाधारणको उल्लेखनीय उपस्थिति रहेको थियो।
गाउँपालिका अध्यक्ष अजमल अख्तर आजादले प्रजातन्त्रको रक्षा र विकासका लागि सबैले आफ्नो स्थानबाट सकारात्मक भूमिका निर्वाह गर्नुपर्नेमा जोड दिए। उनले प्रजातन्त्रको मूल्य, मान्यता, सहिष्णुता र समावेशीतालाई सुदृढ बनाउन यस्ता कार्यक्रमले प्रेरणा दिने विश्वास व्यक्त गरे। “प्रजातन्त्र जनताको अधिकार र स्वतन्त्रताको सुनिश्चितता हो। यसलाई बलियो बनाउन हामी सबै एकजुट हुनुपर्छ,” उनले भने।
त्यस्तै, गाउँपालिका उपाध्यक्ष सुनिता कुमारी उराँवले प्रजातन्त्रलाई स्थायित्व दिन सामुदायिक स्तरमा सचेतना फैलाउनुपर्ने आवश्यकता औंल्याइन्। “प्रजातन्त्रको रक्षा हाम्रो साझा जिम्मेवारी हो। हामी सबैले यसलाई मजबुत बनाउन हातेमालो गर्नुपर्छ,” उनले भनिन्।
कार्यक्रमका सहभागीहरूले दीप प्रज्वलन गर्दै प्रजातन्त्र र स्वतन्त्रताका लागि संघर्ष गर्ने वीर वीरांगनाप्रति श्रद्धाञ्जलि अर्पण गरेका थिए।
