सिँचाइ समस्याबारे कोशी प्रदेश सरकारद्वारा छलफल
रविन्द्र कुमार यादव ,इनरुवा । – कोशी प्रदेश सरकारले किसानहरूको सिँचाइ समस्याबारे गम्भीर छलफल गरेको छ। उक्त छलफलमा पर्यटन, वन तथा वातावरण मन्त्री सदानन्द मण्डल, भौतिक पूर्वाधार विकास राज्य मन्त्री भूमि राजवंशी, सुनसरी-मोरङ सिँचाइ आयोजना प्रमुख मनोहर शाह, सुकशेना शाखा नहरका अध्यक्ष सुकदेव मेहतालगायत सरोकारवालाहरूको उपस्थिति रहेको थियो।
छलफलका क्रममा किसानहरूले सिँचाइ अभावका कारण खेतीमा आइरहेका समस्याबारे जानकारी गराएका थिए। पानी अभावका कारण उत्पादनमा ह्रास आएको र आर्थिक भार बढिरहेको भन्दै उनीहरूले समस्या समाधानका लागि सरकारको ध्यानाकर्षण गराएका थिए।
मन्त्री मण्डलले किसानहरूको समस्या गम्भीर रहेको स्वीकार गर्दै समाधानका लागि तत्काल पहल गर्ने प्रतिबद्धता व्यक्त गरे। “सिँचाइ समस्या समाधान गर्न कोशी सरकार हरसम्भव प्रयास गरिरहेको छ,” उनले भने।
त्यस्तै, राज्य मन्त्री राजवंशीले किसानहरूको समस्यालाई प्राथमिकतामा राखी दीर्घकालीन समाधानका लागि आवश्यक नीति तथा कार्यक्रम अगाडि बढाइने बताए।
छलफलपछि किसानहरूले सरकारको प्रतिबद्धताप्रति सकारात्मक प्रतिक्रिया जनाउँदै सिँचाइ सुधारका लागि चाँडै ठोस कदम चाल्ने आशा व्यक्त गरेका छन्।
