रङ्गहरूको पर्व होली: उत्सव, महत्व र सामाजिक एकता
फागुन शुक्ल पूर्णिमाका दिन मनाइने होली पर्व नेपालभर हर्षोल्लासका साथ मनाइन्छ। फागुपूर्णिमा वा रङ्गहरूको पर्व भनेर पनि चिनिने होली हिन्दू धर्मावलम्बीहरूको प्रमुख चाड हो। यो पर्व विशेष गरी सामाजिक मेलमिलाप, मित्रता र सद्भावको प्रतीक मानिन्छ।
चुन चुन झा / सुनसरी फागुन शुक्ल पूर्णिमाका दिन मनाइने होली पर्व नेपालभर हर्षोल्लासका साथ मनाइन्छ। फागुपूर्णिमा वा रङ्गहरूको पर्व भनेर पनि चिनिने होली हिन्दू धर्मावलम्बीहरूको प्रमुख चाड हो। यो पर्व विशेष गरी सामाजिक मेलमिलाप, मित्रता र सद्भावको प्रतीक मानिन्छ।
होलीको ऐतिहासिक तथा पौराणिक महत्व छ। हिन्दू ग्रन्थहरू अनुसार, यस पर्वको उत्पत्ति प्रह्लाद, हिरण्यकश्यपु र होलिकासँग जोडिएको छ। हिरण्यकश्यपुले आफ्नो भक्त पुत्र प्रह्लादलाई मार्न आगोमा हाल्न लगाउँदा होलिका आफैं जलेर नष्ट भएको किंवदन्ती छ। त्यसैले, होली असत्यमाथि सत्य र अन्यायमाथि न्यायको विजयको प्रतीकका रूपमा मनाइन्छ।
नेपालमा होली पर्वलाई विशेष महत्व दिइन्छ। पहाडी क्षेत्रमा फागुन शुक्ल पूर्णिमाका दिन र तराई क्षेत्रमा त्यसको भोलिपल्ट होली मनाउने चलन छ। यस दिन मानिसहरू आपसमा विभिन्न रङहरू लगाएर रमाइलो गर्छन्, नाचगान गर्छन् र मिठा परिकारहरूको आनन्द लिन्छन्।
सामाजिक रूपमा, होली पर्वले आपसी मित्रता, भाइचाराको सन्देश दिन्छ। यस अवसरमा पुराना गुनासाहरू मेट्दै नयाँ सम्बन्ध स्थापित गर्ने परम्परा रहेको छ। विशेष गरी युवा पुस्ता यो पर्वलाई उल्लासपूर्वक मनाउँछन्।
यद्यपि, होली मनाउँदा मर्यादा कायम राख्न आवश्यक छ। जबरजस्ती रङ लगाउने, मदिरा सेवन गरेर दुर्व्यवहार गर्ने जस्ता क्रियाकलापले पर्वको पवित्रता नै बिगार्न सक्छ।
समग्रमा, होली रङ्ग, उल्लास र सद्भावको पर्व हो। यसलाई मर्यादित र सभ्य तरिकाले मनाउन सकेमा यसको मौलिकता र महत्व झन् बढ्नेछ।
