स्ववियु चुनावमा विवाद: कतै तालाबन्दी, कतै अवरोध
२८ फागुन, काठमाडौं । त्रिभुवन विश्वविद्यालयअन्तर्गत विभिन्न क्याम्पसमा स्ववियु चुनाव प्रक्रिया अवरुद्ध भएको छ। काठमाडौं उपत्यकासहित केही क्याम्पसमा मंगलबार उम्मेदवारी मनोनयनका क्रममा विवाद उत्पन्न भएपछि कतै तालाबन्दी भएको छ भने कतै मनोनयन नै हुन सकेको छैन।
काठमाडौं उपत्यकाका पाँच क्याम्पसमा चुनावी प्रक्रिया रोकिएको छ। सरस्वती क्याम्पसमा मतदाता सूचीमा विवाद भएपछि तालाबन्दी गरिएको छ। नेपाल ल क्याम्पसमा विद्यार्थी संगठनहरू दर्ता नै नभएकाले प्रक्रिया अघि बढ्न सकेको छैन। त्रिविका अनुसार ल क्याम्पसमा सुरुदेखि नै विवाद चलिरहेको छ। पब्लिक युथ क्याम्पसमा मतदाता नामावलीमा असहमति देखिएपछि प्रक्रिया रोकिएको छ। थापाथली इन्जिनियरिङ क्याम्पसमा एउटै संगठनबाट दुई छुट्टाछुट्टै उम्मेदवारी परेपछि तालाबन्दी भएको छ।
शंकरदेव क्याम्पसमा पनि मतदाता सूचीसम्बन्धी विवादका कारण तालाबन्दी छ। धनुषाको रामस्वरुप रामसागर बहुमुखी (राराब) क्याम्पसमा भर्नासम्बन्धी समस्याले चुनावी प्रक्रिया नै अघि बढ्न सकेको छैन। त्रिविका अनुसार त्यहाँ विभिन्न विद्यार्थी संगठनहरूले तालाबन्दी गरेका छन्।
सुर्खेत बहुमुखी क्याम्पसमा केही समूहले उम्मेदवारी दर्ता गरे पनि अन्यलाई अनुमति नदिएको भन्दै विवाद चर्किएको छ। त्यहाँ सहमतिको प्रयास भइरहेको छ। बुटवल र भैरहवा क्याम्पसमा पनि तालाबन्दी कायम छ।
नेपाली कांग्रेसनिकट विद्यार्थी संगठन नेविसंघले त्रिवि क्याम्पसमा उम्मेदवारी विवादका कारण तालाबन्दी गरेको छ। नेविसंघका दुई समूह— दिपकराज जोशी र अनोज कार्की पक्षले उम्मेदवारी मनोनयन दर्ता गरेका थिए। निर्वाचन अधिकृतको कार्यालयले जोशी नेतृत्वको उम्मेदवारीलाई मात्र मान्यता दिएपछि कार्की पक्ष असन्तुष्ट हुँदै तालाबन्दीमा उत्रिएको हो।
त्रिविले विवाद समाधानका लागि वार्ता र संवाद जारी रहेको जनाएको छ। त्रिवि विद्यार्थी कल्याण परिषद्का सदस्यसचिव पशुपति अधिकारीका अनुसार प्रक्रियागत अवरोध हटाउन सहमतिको प्रयास भइरहेको छ।
