प्रदेश र जिल्लास्तरीय रिटर्नी सञ्जालका सदस्यहरूका लागि ३ दिने क्षमता अभिवृद्धि कार्यक्रम सम्पन्न
चुन चुन झा / विराटनगर, प्रदेश सरकार, सामाजिक विकास मन्त्रालय कोशी प्रदेश, विराटनगरको आयोजनामा प्रदेश र जिल्लास्तरीय रिटर्नी सञ्जालका सदस्यहरूका लागि तीन दिने क्षमता अभिवृद्धि कार्यक्रम सम्पन्न भएको छ। उक्त कार्यक्रम २०८१ साल फाल्गुन १८ गतेदेखि २० गतेसम्म विराटनगरस्थित श्रीकृष्ण होटलमा सम्पन्न भएको हो।
कार्यक्रम संचालन सामाजिक विकाश मन्त्रालय कोशी प्रदेशका कार्यक्रम अधिकृत प्रदीप गौतमले गर्नुभएको थियो भने कार्यक्रमको अध्यक्षता सामाजिक विकास मन्त्रालय कोशी प्रदेश, विराटनगरका सचिव ले गर्नुभएको थियो। कार्यक्रममा मन्त्रालयका महासाखा प्रमुख शम्भु प्रसाद साह र यादव प्रसाद दुलाल, आर्थिक महासाखा प्रमुख भोलानाथ नेपाल, प्रशिक्षक सुनिल न्यौपाने, सामी कोशी प्रदेश प्रबन्धक कोपिला दाहाल, सामी कार्यक्रमका अधिकृत देवनारायण चौधरी, रेमी परियोजना प्रमुख सपना थापा तथा आप्रवासी हकहित संरक्षण केन्द्र कोशी प्रदेशका सम्पूर्ण पदाधिकारी तथा जिल्लास्तरीय पदाधिकारीहरूको उपस्थिति रहेको थियो।
छलफलका मुख्य विषयहरू
कार्यक्रममा आप्रवासी सम्बन्धी विभिन्न महत्वपूर्ण विषयहरूमा छलफल भएको थियो। प्रशिक्षक तथा विज्ञहरूले आप्रवासी सम्बन्धी नियम, कानुन, ऐन, आप्रवासीहरूको समस्या लगायतका विविध विषयहरूमा जानकारी दिएका थिए। सहभागीहरूले आफ्ना अनुभवहरू साझा गर्दै आप्रवासी श्रमिकहरूले सामना गरिरहेका मुख्य चुनौतीहरूमाथि विचार-विमर्श गरेका थिए।
प्रशिक्षणमा निम्न विषयहरूमा विशेष छलफल गरिएको थियो:
✔ आप्रवासी श्रमिकहरूको कानुनी अधिकार तथा संरक्षण
✔ पुन: एकीकरणको चुनौती र समाधान
✔ वैदेशिक रोजगारीसँग सम्बन्धित ऐन तथा कानुनी प्रक्रिया
✔ आप्रवासीहरूका लागि नीति तथा कार्यक्रमहरू
कार्यक्रमको समापन समारोहमा बोल्दै सचिव हेमराज तामाङले आप्रवासी श्रमिकहरूको अधिकार रक्षा तथा उनीहरूको पुन:स्थापना प्रक्रियालाई प्रभावकारी बनाउन यस्ता कार्यक्रमहरू आवश्यक रहेको उल्लेख गर्नुभयो। साथै, सहभागीहरूलाई प्राप्त ज्ञान र सीपलाई व्यवहारमा उतार्न आग्रह गर्दै उनले प्रदेश सरकार आप्रवासी श्रमिकहरूको हकहित संरक्षणका लागि प्रतिबद्ध रहेको स्पष्ट पार्नुभयो।
उक्त क्षमता अभिवृद्धि कार्यक्रमले आप्रवासी श्रमिकहरूको हकहित संरक्षणका लागि कार्यरत संघसंस्थाहरूलाई थप प्रभावकारी रूपमा काम गर्न उत्प्रेरित गर्ने अपेक्षा गरिएको छ।
