रुपेश मेहता, मोरंग । कोशी प्रदेशका पर्यटन, वन तथा वातावरण मन्त्री सदानन्द मण्डलले मोरङको सुन्दरहरैचा नगरपालिका–५ मा रहेको हसिना सिमसार, संगम स्थल र धार्मिक तथा ऐतिहासिक महत्व बोकेको वृद्धगंगा नदी तटको निरीक्षण गरेका छन्। साथै, उनले नयाँ वृन्दावन गौशालाको स्थलगत अवलोकन गर्दै पर्यटन प्रवर्द्धनका लागि आवश्यक पहल गर्ने प्रतिबद्धता व्यक्त गरेका छन्।
निरीक्षणका क्रममा मन्त्री मण्डलले यी स्थलहरू भारतीय पर्यटकका लागि मुख्य गन्तव्य बन्न सक्ने र स्थानीयहरूका लागि रोजगारी तथा व्यापारको अपार सम्भावना रहेको बताए। उनले पर्यटन प्रवर्द्धनमार्फत स्थानीय अर्थतन्त्रलाई सशक्त बनाउन सकिने उल्लेख गर्दै सरकारको तर्फबाट आवश्यक पहल गरिने आश्वासन दिए।
“पर्यटन विकासमा कुनै पनि बाधा नपुग्ने गरी कोशी प्रदेश सरकारले काम गरिरहेको छ,” मन्त्री मण्डलले भने। उनले आफ्नो मन्त्रालयको तर्फबाट यी स्थलहरूको संरक्षण, पूर्वाधार विकास र प्रवर्द्धनका लागि आवश्यक नीति तथा कार्यक्रम अगाडि बढाइने प्रतिबद्धता जनाए।
स्थानीय नागरिक र व्यवसायीहरूले मन्त्री मण्डलको निरीक्षणलाई सकारात्मक रूपमा लिँदै पर्यटन पूर्वाधारको विकासमा सरकारको ध्यानाकर्षण आवश्यक रहेको बताए। उनीहरूले हसिना सिमसार, वृद्धगंगा नदी तट र वृन्दावन गौशालालाई व्यवस्थित गर्दै पर्यटक आकर्षित गर्न सरकारको सहयोगको अपेक्षा गरेका छन्।
मन्त्री मण्डलको निरीक्षणपछि स्थानीय स्तरमा पर्यटन विकासको आशा बढेको छ। पर्यटन पूर्वाधार निर्माण, प्रचारप्रसार तथा बजेट विनियोजन जस्ता कार्यलाई प्राथमिकतामा राख्दै सरकारले चाँडै नै योजना अघि बढाउने अपेक्षा गरिएको छ।
