कोशी प्रदेश पर्यटन वर्ष २०८२: उद्घाटनका लागि प्रधानमन्त्री ओलीलाई निमन्त्रणा
काठमाडौं – कोशी प्रदेश सरकारले पर्यटन प्रवर्द्धनलाई प्राथमिकता दिँदै आगामी वर्षलाई “कोशी प्रदेश पर्यटन वर्ष २०८२” को रूपमा घोषणा गरेको छ। यस महत्त्वपूर्ण अभियानको शुभारम्भ आगामी चैत २७ गते तेरथुम जिल्लाको तीनजुरे-मिल्के-जलजले (लालीगुराँस नगरपालिका, आर.आर. गार्डेन) क्षेत्रमा हुने भएको छ।
पर्यटन, वन तथा वातावरण मन्त्री सदानन्द मण्डल तथा मन्त्रालयका सचिव विशाल घिमिरे सहितको टोलीले बिहीबार प्रधानमन्त्री केपी शर्मा ओली लाई बालुवाटारमा भेटी कार्यक्रमका लागि प्रमुख अतिथि बन्न औपचारिक निमन्त्रण गरेका छन्। भेटका क्रममा कोशी प्रदेशको पर्यटन सम्भावना, पर्यटन वर्ष मनाउनुको औचित्य, तथा यस अभियानले प्रदेश र राष्ट्रिय अर्थतन्त्रमा पार्ने प्रभावबारे विस्तृत छलफल भएको थियो।
कोशी प्रदेश सरकारले पर्यटन प्रवर्द्धनका लागि निजी क्षेत्रसँग सहकार्य गर्दै दीर्घकालीन योजना अघि बढाउने नीति लिएको छ। प्रदेश गौरव कार्यक्रम अन्तर्गत समावेश गरिएको यो अभियानले स्थानीय, राष्ट्रिय तथा अन्तर्राष्ट्रिय पर्यटकलाई आकर्षित गर्ने लक्ष्य राखेको छ। यसले कोशी प्रदेशको आर्थिक, सांस्कृतिक तथा सामाजिक विकासमा महत्त्वपूर्ण योगदान दिने विश्वास गरिएको छ।
