कोशी प्रदेश पर्यटन वर्ष २०८२ को उद्घाटन तथा सुरक्षा तयारी बैठक सम्पन्न
धनकुटा, रविन्द्र कु यादव – कोशी प्रदेश सरकारले घोषणा गरेको “कोशी प्रदेश पर्यटन वर्ष २०८२” को भव्य उद्घाटन तथा शुभारम्भ कार्यक्रमको तयारी अन्तिम चरणमा पुगेको छ। सो कार्यक्रमलाई सफल बनाउन सुरक्षालाई विशेष प्राथमिकता दिइएको छ, जसअनुसार एक महत्वपूर्ण तयारी तथा सुरक्षा बैठक सम्पन्न भएको छ।
बैठकमा उपस्थित सरोकारवालाहरूले सुरक्षा व्यवस्थालाई चुस्त-दुरुस्त बनाउन सहमति जनाउँदै कार्यक्रमलाई शान्तिपूर्ण, व्यवस्थित, र प्रभावकारी रूपमा सम्पन्न गर्ने प्रतिबद्धता व्यक्त गरे। सुरक्षाका हरेक पक्षलाई सूक्ष्म रूपमा विश्लेषण गरी आवश्यक रणनीतिहरू तय गरिएका छन्।
बैठकमा कोशी प्रदेशका प्रमुख मन्त्रीहरू तथा सुरक्षासँग सम्बन्धित उच्च अधिकारीहरूको सहभागिता रहेको थियो।जसमा कोशी प्रदेश आन्तरिक मामिला तथा कानुन मन्त्री माननीय रेवतीरमण भण्डारी, वन वातावरण तथा पर्यटन मन्त्री सदानन्द मण्डल, भौतिक पूर्वाधार राज्य मन्त्री भूमि प्रसाद राजवंशी, कोशी प्रदेशका पूर्व मुख्यमन्त्री उद्धव थापा, सुरक्षा निकाय प्रमुखहरू, जिल्ला प्रशासन प्रमुखहरू, र राष्ट्रिय अनुसन्धान तथा नेपाली सेनाका उच्च अधिकारीहरू सहभागी थिए।
बैठकमा सुरक्षाका सबै पक्षलाई मजबुत बनाउने निर्णय गरिएको छ। सुरक्षाकर्मीहरूलाई कार्यक्रम स्थल वरिपरि परिचालन गर्ने, सीसीटीभी निगरानी बढाउने, आकस्मिक सहायता टोली तयार राख्ने, र भीआईपी सुरक्षा सुनिश्चित गर्ने जस्ता उपायहरू अवलम्बन गरिनेछ।
बैठकमा बोल्दै मन्त्री रेवतीरमण भण्डारीले पर्यटन प्रवर्द्धनका लागि यो वर्ष महत्वपूर्ण अवसर भएको बताउँदै कार्यक्रममा कुनै पनि अव्यवस्था हुन नदिन सुरक्षा संयन्त्रलाई पूर्णरूपमा परिचालित गर्ने बताए। पर्यटन मन्त्री सदानन्द मण्डलले कोशी प्रदेशलाई पर्यटन गन्तव्यको रूपमा स्थापित गर्ने लक्ष्य रहेको उल्लेख गर्दै सो कार्यक्रम ऐतिहासिक बन्ने बताए।
पर्यटन वर्ष २०८२ लाई सफल बनाउन कोशी प्रदेश सरकारले विभिन्न प्रचार-प्रसार तथा पूर्वाधार विकासका कामहरू अघि बढाएको छ। धनकुटा, इलाम, संखुवासभा, ताप्लेजुङ, र भोजपुर लगायतका जिल्लामा पर्यटन प्रवर्द्धनका लागि विशेष कार्यक्रमहरू आयोजना गरिनेछन्।
कोशी प्रदेश पर्यटन वर्ष २०८२ को उद्घाटन समारोहमा राष्ट्रिय तथा अन्तर्राष्ट्रिय पाहुनाहरूको सहभागिता रहनेछ। पर्यटक आकर्षित गर्न संस्कृतिक कार्यक्रम, पर्यटन मेलाहरू, साहसिक खेलकुद गतिविधि, र विशेष प्रदर्शनीहरू समेत आयोजना गरिनेछ।
सुरक्षा बैठक सफलतापूर्वक सम्पन्न भएसँगै अब कोशी प्रदेश पर्यटन वर्ष २०८२ को उद्घाटन समारोहलाई प्रभावकारी बनाउन अन्तिम तयारीमा जुट्न आयोजक समिति सक्रिय रहेको छ।
