सिकाइ क्षति न्यूनीकरण: ReAL योजना मार्फत बालबालिकाको भविष्य सुधार
सिकाइ क्षति न्यूनीकरण: ReAL योजना मार्फत बालबालिकाको भविष्य सुधार
सुनसरी: शिक्षा क्षेत्रमा सुधार गर्दै बालबालिकाको भविष्य उज्यालो बनाउन शिक्षा, विज्ञान तथा प्रविधि मन्त्रालय र स्ट्रिट चाइल्ड अफ नेपालको सहकार्यमा मधेश प्रदेशको बर्दिवासमा दुईदिने प्रशिक्षक प्रशिक्षण कार्यक्रम सम्पन्न भएको छ। यो कार्यक्रम ReAL योजना (Recovery and Accelerated Learning) अन्तर्गत सञ्चालन गरिएको थियो।
कोभिड-१९ महामारीका कारण विद्यालय बन्द हुँदा बालबालिकाले सिकाइको अवसर गुमाउन पुगेका थिए, जसले शिक्षा क्षेत्रमा गम्भीर असमानता निम्त्यायो। यस समस्यालाई समाधान गर्न शिक्षा मन्त्रालयले ReAL योजना कार्यान्वयन सुरु गरेको हो।
कार्यक्रमको दोस्रो दिन ५० भन्दा बढी प्रशिक्षकहरूले Teaching at the Right Level (TaRL) पद्धतिको आधारमा नयाँ शिक्षण रणनीतिहरूमा प्रशिक्षण लिएका थिए। TaRL पद्धतिमा विद्यार्थीको सिकाइ स्तरको मूल्यांकन गरिन्छ र सोहीअनुसार समूह विभाजन गरी उपयुक्त शिक्षण सामग्री उपलब्ध गराइन्छ।
प्रशिक्षणका प्रमुख प्रशिक्षकहरू शिक्षा मन्त्रालय र स्ट्रिट चाइल्ड अफ नेपालका विशेषज्ञ थिए। उनीहरूले ReAL योजनाका चार मुख्य प्रक्रियाहरू प्रस्ट पारे:
- सिकाइ स्तर परीक्षण: विद्यार्थीहरूको वर्तमान अवस्था पत्ता लगाउन।
- समूह वर्गीकरण: समान स्तर भएका विद्यार्थीलाई समूहबद्ध गर्न।
- सिकाइ सुधार गतिविधिहरू: ६ देखि १० हप्तासम्मको योजना बनाएर सञ्चालन गर्न।
- नतिजा व्यवस्थापन: सुधारको नतिजा IEMIS (एकीकृत शैक्षिक सूचना व्यवस्थापन प्रणाली) मा अभिलेख गर्न।
कार्यक्रम समापन समारोहमा शिक्षा तथा मानव स्रोत विकास केन्द्रका निर्देशक टुकराज अधिकारीले ReAL योजनाको महत्त्वबारे चर्चा गर्दै यसले बालबालिकाको सिकाइ स्तरमा सकारात्मक परिवर्तन ल्याउने विश्वास व्यक्त गरे। उनले योजना कार्यान्वयनका लागि सरकारले आवश्यक बजेट सुनिश्चित गरिसकेको बताए।
समापनमा धनुषा र भक्तपुरका स्थानीय तहका प्रतिनिधिहरूले आगामी शैक्षिक सत्रदेखि ReAL योजना लागू गर्ने प्रतिबद्धता व्यक्त गरे।
