विश्वकप छनोटमा विजयी सुरुवातसँगै उत्साहित नेपाली टोली, खेलाडी भन्छन्– ‘सबै खेल फाइलन सरह हुन्’
काठमाडौं– नेपालले आईसीसी टी–२० आईको विश्वकप एशिया क्षेत्रको छनोट खेलमा विजय यात्रा सुरु गरेको छ।
तुलनात्मक रुपमा कमजोर रहेको सिंगापुरसँग पहिलो खेलमा नेपालले आठ विकेटको जित हात पार्दे उत्साहित सुरुवात गरेको छ। विश्वकप खेल्ने प्रचुर सम्भावना बोकेर मैदानमा उत्रेको घरेलु टोली नेपाल बलियो दाबेदार पनि हो।
छनोट चरणबाट फाइनलमा पुग्ने दुई टोली छनोट हुने भए पनि नेपाल विजेताको रुपमा विश्वकप जान चाहेको छ। यसका लागि सबै तयारी पनि नेपालले गरेको उसको सुरुवाती खेलले देखिएको छ। नेपाल ब्याटिङ र बलिङ दुवैमा उत्कृष्ट प्रदर्शन गर्दै फाइनलमा छनोट चरणको विजेता बनेर विश्वकपमा टेष्ट खेल्ने देशहरुविरुद्ध चमत्कारिक नजिता निकाल्ने योजनासहित खेलिरहेको छ।
यसका लागि नेपाली खेलाडी र प्रशिक्षक मोन्टी देशाईले मिहेनत पनि गरेको पछिल्ला प्रदर्शनहरुले देखाएको छ।सोमबारको खेलमा पनि नेपाली खेलाडीमा उक्त उत्साह देखिएको छ। नेपाली खेलाडीहरुले खेलपछि पनि नेपालले हरेक खेललाई फाइनल सम्झेर खेल्ने दाबी गर्दै गम्भीरता देखाएका छन्।
पहिलो दिनको खेलमा उत्कृष्ट प्रदर्शन गरेको नेपाली क्रिकेट टोलीका ओपनर कुशल भुर्तेलले सिंगापुरमाथि आठ विकेटको जित निकालेपछि हरेक खेल फाइनलसरह नै खेल्ने बताए। आइसीसी टी–२० विश्वकप क्रिकेट छनोटअन्तर्गत एशिया क्वालिफायरको पहिलो खेलमा सोमबार सहज जित निकालेपछि कुशलले सबै खेल फाइनलसरह नै खेल्ने प्रतिक्रिया दिएका हुन्।
नेपालका अर्का भरपर्दा अलराउन्डर गुल्सन झाले पनि नेपालले विश्वकप खेल्ने आसा रहेको बताए। ‘हाम्रो लागि सन् २०१४ पछि अहिले राम्रो मौका छ,’ उनले भने, ‘हामी विश्वकप छनोट हुनेमा विश्वस्त र आशावादी छौं।’
पहिलो खेलमा सबै खेलाडीले राम्रो गरेको उल्लेख गर्दै कुशलले हरेक खेल फाइनल जसरी खेल्ने धारणा राखे। कीर्तिपुरस्थित त्रिभुवन विश्वविद्यालय क्रिकेट मैदानमा १४५ रनको लक्ष्य नेपालले १६.३ ओभरमा मात्र दुई विकेटको क्षतिमा पूरा गर्दै जारी विश्वकप छनोटमा सुखद् सुरुवात गरेको थियो।
नेपालको जितमा कुशलले ४८ बलमा ७५ रन बनाए। उनको इनिङमा आठ चौका र दुई छक्का रह्यो। नेपाललाई जितका लागि पाँच रन आवश्यक हुँदा उनी अन्ततः कृष्णको बलमा आउट भए। तर लगत्तै ब्याटिङ गर्न आएका कुशल मल्लले पहिलो बलमा नै छक्का प्रहार गर्दै २१ बल अगावै जित सुरक्षित दिलाए।
नेपाली राष्ट्रिय क्रिकेट टोलीका ओपनर कुशल भुर्तेलले आफ्ना प्रशिक्षक मोन्टी देसाईको लगातारको भरोसालाई सही सावित गर्न सकेकोमा खुशी लागेको बताए। उनले पछिल्ला खेलमा आफ्नो प्रदर्शन राम्रो हुन नसके पनि प्रशिक्षक देसाई आफूमाथि लगातार विश्वास गरिरहेको उल्लेख गरे।
मुलपानीमा पछिल्ला खेलहरू आफ्ना लागि राम्रो नभए पनि प्रशिक्षक मोन्टी देसाईले विश्वास गरिराख्दा यस किसिमको प्रदर्शन सम्भव भएको उनको भनाइ थियो।
कुशलले सिंगापुरविरुद्ध अर्धशतकसँगै ७४ रनको पारी खेले। गत त्रिकोणात्मक श्रृङ्खलाको फाइनलमा पनि उनले संयुक्त अरब इमिरेट्स(युएई)सँग ५० रनको अर्धशतकीय इनिङ खेलेका थिए।
लगातार अर्धशतक प्रहार गरेका कुशलले ढेड वर्षपछि पहिलो विकेटका लागि आसिफ सेखसँग ८४ रनको अर्धसतकीय साझेदारी पनि गरेका छन्। कुशलले आसिफ शेखसँग पछिल्ला दुई/तीन वर्षदेखि नियमित ओपनिङ गरिरहेकाले एकअर्काप्रति राम्रो कम्यूनिकेशन हुने गरेको बताए।
तर सोमबार आसिफसँग ढेड वर्षपछि अर्धशतकीय साझेदारी गर्न सक्दा निकै खुशी भएको पनि प्रतिक्रिया उनले दिए। सिंगापुरसँगको खेल अगाडि नेपालका अलराउण्डर दीपेन्द्रसिंह ऐरी घाइते भएका थिए। अभ्यासका क्रममा गोलीगाँठोमा चोट बोकेका दीपेन्द्रको पुनरागमनबारे अहिले नै केही भन्न नसकिने नेपाल क्रिकेट संघ (क्यान) ले जनाएको छ।
कुशलले वर्षको अन्तिम प्रतियोगिताका रूपमा रहेको विश्वकप छनोटमा नेपालका महत्त्वपूर्ण अलराउण्डर दीपेन्द्रसिंह चोटग्रस्त हुँदा निकै दुःख लागेको बताए। बिहान फिल्डिङ गर्दा दीपेन्द्रको एन्कलमा चोट लागेको थियो। नेपाली राष्ट्रिय टोलीका अलराउण्डर गुल्सन झाले शतप्रतिशत आफूहरू विश्वकपमा छनोट हुने विश्वास व्यक्त गरे।
नेपालको इनिङमा आसिफले २७ रन र कप्तान रोहित पौडेलले २४ बलमा ३५ रन बनाए पछि नेपालले सहज जित निकालेको थियो। त्यसअघि टस जितेर पहिले ब्याटिङ गरेको सिंगापुरले निर्धारित २० ओभरमा ९ विकेट गुमाएर १४५ रनको मध्यम योगफल खडा गर्यो। खराब सुरुवात गरेको सिंगापुरका लागि ओपनर रोहन रंगराजनले सर्वाधिक ४६ रनको योगदान दिए।
मनप्रीत सिंहले २४ रन र आर्यावीर चौधरीले ३७ रन जोडे। त्यसबाहेक अन्य ब्याटर भने क्रिजमा जम्न सकेनन्। नेपालको इनिङमा अविनाश बोहोराले तीन विकेट तथा सन्दीप लामिछाने, गुल्सन झा र करण केसीले समान दुई विकेट लिए। समूह ‘ए’ मा रहेको नेपालले पहिलो खेल जित्दै सुखद् सुरुवात गरेको छ।
