पोखरामा जहाज दुर्घटना: सनाखत गरिएका शव आज परिवारलाई जिम्मा लगाइने

यति एयरलायन्सको ९ एन-एएनसी पोखरामा जहाज दुर्घटनामा परेर मृत्यु भएकाहरूको शव परिवारका सदस्य तथा आफन्तहरूलाई जिम्मा लगाइने भएको छ।

सोमबार बिहान ९ बजेदेखि आवश्यक प्रक्रिया पूरा गरी पहिचान भएका शवहरुलाई परिवारलाई बुझाउने जिल्ला प्रशासन कार्यालय कास्कीका सहायक प्रमुख जिल्ला अधिकारी अनिल शाहीले जानकारी दिए।

विदेशी नागरिकको र पहिचान नभएका शव भने काठमाडौंमा ल्याउने तयारी भैरहेको छ। काठमाडौंमा आफन्त तथा परिवार भएका स्वदेशी व्यक्तिहरूको शव पनि हेलिकप्टरबाट आज काठमाडौं ल्याउने तयारी छ।

जहाजमा चालक दलका चार जनासहित ७२ जना थिए।

जहाज दुर्घटनाको कारण अझै नखुलेको त्रिभुवन विमानस्थलस्थित उद्धार तथा राहत केन्द्रले जनाएको छ ।